| Amours me fait comen cier une chancon nouele. quele me uuet ensoignier a amer la pl(us) bele qui soit ou mont uiua(n)t. cest la bele au cors gent. cest cele do(n)t ie chant. dex men doint tel no- uele. qui soit a mon talant. que menu et souuent mes cuers por li sautele. |
I. Amours me fait comencier une chançon novele, qu'ele me vuet ensoignier a amer la plus bele qui soit ou mont vivant: c'est la bele au cors gent, c'est cele dont je chant. Dex m'en doint tel novele qui soit a mon talant! que menu et souvent mes cuers por li sautele. |
| Bien me porroit auancier ma dou ce dame bele. sele me uoloit aidier a ceste chanco(n)ne le. ie nain nule rien tant co(n)me li soulement (et) son afaitement q(ui) mon cuer renouele. amours me lace (et) prent et fait lie (et) ioi- ant por ce qua soi mapele. |
II. Bien me porroit avancier ma douce dame bele, s'ele me voloit aidier a ceste chançonnele. Je n'ain nule rien tant conme li soulement et son afaitement, qui mon cuer renovele. Amours me lace et prent et fait lié et joiant, por ce qu'a soi m'apele. |
| Quant fine amour me semo(n)t mout me plait (et) agree. q(ue) cest la riens en cest mont q(ue) iai plus desirree. or la mestuet seruir. ne men puis plus tenir. (et) du tout obeir plus que rien qui soit nee. sele me fait languir. (et) uois ius- quau morir. mame en sera sau uee. |
III. Quant fine amour me semont, mout me plait et agree, que c'est la riens en cest mont que j'ai plus desirree. Or la m'estuet servir - ne m'en puis plus tenir - et du tout obeïr plus que rien qui soit nee. S'ele me fait languir et vois jusqu'au morir, m'ame en sera sauvee. |
| Se la mieudre de ce mo(n)t ne ma samour donee. tuit li a moreus diront ci a fort destine e. sa ce puis ia uenir que ie sa(n)z repentir. ma ioie (et) mo(n) plaisir de li quai tant amee. lors diro(n)t sanz mentir quaurai tot mo(n) de sir. et maqueste a cheuee. |
IV. Se la mieudre de ce mont ne m'a s'amour donee, tuit li amoreus diront ci a fort destinee. S'a ce puis ja venir que je, sanz repentir, ma joie et mon plaisir de li, qu'ai tant amee, lors diront, sanz mentir, qu'avrai tot mon desir et ma queste achevee. |
| Bele por cui sopir. la blonde coronee. puet bien dire (et) iehir que por li sanz mentir sest amours m(ou)lt hastee. |
V. Bele por cui sopir, la blonde coronee, puet bien dire et jehir que por li, sanz mentir, s'est Amours moult hastee. |