Edizione diplomatico-interpretativa

Versione stampabilePDF version

Testo Careri 1996, p. 399.

No sap chantar quil so non di
Ni uers trobar quils motz non fa
Ni conois de rima cos ua
Si razo \non/ enten en si
Mai lo mieus chantars comensaisi
Con plus lauziretz mais ualra. 
I.
No sap chantar qui·l so non di
ni vers trobar qui·ls motz non fa,
ni conois de rima co·s va
si razo non enten en si.
Mai lo mieus chantars comens'aisi:
con plus l'auziretz, mais valra.
Nuils hom nos merauill de mi
Sieu am so que ia nom ueira
Quel cor ioi dautramor nona
Mai daisella que anc non ui
Ni per nuill ioi aitan non ri
E no sai cals bes men uenra.
II.
Nuils hom no·s meravill de mi
s'ieu am so que ja no·m veira,
que·l cor joi d'autr'amor non a
mai d'aisella que anc non vi,
ni per nuill joi aitan non ri
e no sai cals bes m'en venra.
Colp de ioi mi fer que mausi
E ponha damor quem sostra
La carn don lo cors magrira
Et anc mai tan greu nom feri
Ni per nuill colp tan non langui
Car no coue ni non sesca.
III.
Colp de joi mi fer que m'ausi,
e ponha d'amor que·m sostra
la carn, don lo cors magrira;
et anc mai tan greu no·m feri
ni per nuill colp tan non langui,
car no cove ni non s'esca.
Anc tan souen nomadurmi
Mos esperitz tost non fos la
Ni tan dira non ac de sa
Mos cors ades non fos aqui
E can mi reisit lo mati
Totz mos bos sabers mi desua.
IV.
Anc tan soven no m'adurmi
mos esperitz tost non fos la,
ni tan d'ira non ac de sa
mos cors ades non fos aqui;
e can mi reisit lo mati
totz mos bos sabers mi desva.    
Ben sai canc de lieis nom iauzi
Ni ia de mi nos iauzira
Ni per son amic nom tenra
Ni couen nom fara de si
Anc nom dis uer ni nom menti
Ni non sai si ia mi ueira
                         Bon es lo uers
V.
Ben sai c'anc de lieis no·m jauzi
ni ja de mi nos jauzira,
ni per son amic no·m tenra
ni coven no·m fara de si.
Anc no·m dis ver ni no·m menti,
ni non sai si ja mi veira.
Bon es lo uers anc noi failli
Si tot so quei es ben esta
E sel que de mi la penra
Gart nol franha ni nol pessi
E uueil lauia en caersi
En bertrans el comps en tolza.
VI.
Bon es lo vers, anc no·i failli
si tot so que·i es ben esta;
e sel que de mi l'apenra
gart no·l franha ni no·l pessi.
E vueil l'avia en Caersi
en Bertrans e·l comps en Tolza,
Bos es lo uers e faran hi
Calque re don hom chantara.
VII.
bos es lo vers, e faran hi
calque re don hom chantara.