| I | |
| Bele emmelos es pres de- souz larbroie. pleure Guion sor lerbe qui ver doie. por mal mari qui la bat et laidoie. maiz por destrainte de chaistoi. ne puet son cuer retraire a soi. et Guis aime emmelot de foi. |
Bele Emmelos es pres desouz l'arbroie, pleure Guion sor l'erbe qui verdoie por mal mari qui la bat et laidoie; maiz por destrainte de chaistoi ne puet son cuer retraire a soi. Et Guis aime Emmelot de foi. |
| II | |
| Forment se plaint la bele et mout ses- froie. et dit plorant amis trop me guerroie. por vostre amor mes maris et maistroie. si (con)ques mes fille de roi; ne fu menee atel des- roi. Et Guis. |
Forment se plaint la bele et mout s'esfroie, et dit plorant: «Amis, trop me guerroie por vostre amor mes maris et maistroie si c'onques mes fille de roi ne fu menee a tel desroi». Et Guis [aime Emmelot de foi.] |
| III | |
| Lasse ou fuirai quel sentier ne quel voie. Nai desirrier amis fors que vous voie. car sun seul ior amon bon vous auoie. tant ameroie le dosnoi; que iamaiz naueroie anoi. Et Guis. |
«Lasse, ou fuirai, quel sentier ne quel voie? N'ai desirrier, amis, fors que vous voie, car s'un seul jor a mon bon vous avoie, tant ameroie le dosnoi que jamaiz n'averoie anoi». Et Guis [aime Emmelot de foi.] |
| IV | |
| Li suens maris lentent mout se gra- moie. de la bele qui si le contraloie. ali sen vint. par mi les dras de soie. la bati tant. q(ue) por vn poi; ne la morte les le rapoi. Et Guis. |
Li suens maris l'entent, mout se gramoie de la bele qui si le contraloie. A li s'en vint, par mi les dras de soie la bati tant que por un poi ne la morte les le rapoi. Et Guis [aime Emmelot de foi.] |
| V | |
| Tant li debat sa char quele persoie. si q(ue)n cent leus li desfront et pecoie. apres les colz son douz ami rechoie. qui sen repairoit del tornoi. par auenture les launoi. Et Guis. |
Tant li debat sa char qu'ele persoie si qu'en cent leus li desfront et pecoie. Apres les colz son douz ami rechoie qui s'en repairoit del tornoi. Par aventure les l'aunoi. Et Guis [aime Emmelot de foi.] |
| VI | |
| Samie entent li cuens vers li sauoie. sa dolor voit apou quil ne maruoie. bele emmelot fait il dex vos poruoie. dites moi bele ie vos proi. son vos a batue por moi. Et. |
S'amie entent li cuens, vers li s'avoie, sa dolor voit, a pou qu'il ne marvoie. «Bele Emmelot» fait il «Dex vos porvoie, dites moi, bele, je vos proi, s'on vos a batue por moi.» Et [Guis aime Emmelot de foi.] |
| VII | |
| Bele emmelos qui sospirant larmoie. li dit amis por vos les maus amoie. que me faisoit li dux quant vos nomoie. et dit de vos amer nai loi. or me sormainne a estre loi. Et Guis. |
Bele Emmelos, qui sospirant larmoie, li dit: «Amis, por vos les maus amoie que me faisoit li dux quant vos nomoie, et dit de vos amer n'ai loi. Or me sormainne a estre loi». Et Guis [aime Emmelot de foi.] |
| VIII | |
| Qvant li quens lot durement li anoie. lespee trait dont li aciers burnoie. le duch a mort durement si manoie. samie en por- te sanz effroi. deuant lui sor son palefroi. Et Guis. |
Quant li quens l'ot durement li anoie: l'espee trait dont li aciers burnoie. Le duch a mort: durement si manoie. S'amie enporte sanz effroi devant lui sor son palefroi. Et Guis [aime Emmelot de foi.] |
| IX | |
| En son pais porte li cuens sa proie. sa da- me en fait. ali seruir sotroie. et la bele na talent que recroie. de lui seruir en bo- ne foi. mout sentraiment de cuer andoi. Et Guis. |
En son païs porte li cuens sa proie, sa dame en fait a li servir s'otroie et la bele n'a talent que recroie de lui servir en bone foi. Mout s'entraiment de cuer andoi. Et Guis [aime Emmelot de foi.] |