| Raembautz daurenga. | Raembautz d'Aurenga |
| I | I |
| A R sespan la flors enuersa. Pels tren- zanz rancs epels tertres. Cals flors gels neus econglapis. Que cors ede- streing etrenca. Don uei morz quils critz brais siscles. Els fueilz elz rams (et)els gis- cles. Mas mite(n) uert eianzens iois.Er ca(n) uei secs los dolenz crois. |
Ar s’espan la flors enversa pels trenzanz rancs e pels tertres. Cals flors ? Gels, neus e conglapis, que cors e destreing e trenca, don vei morz quils, critz, brais, siscles, e.ls fueilz e.ls rams et e.ls giscles - mas mi ten vert e ianzens iois er, can vei secs los dolenz crois. |
| II | II |
| C ar enaisi mo en uerse. Que plan mi se(m)- blon li tertre.Etenc p(er) flor lo co(n)glapi.El caut me sius qel freg trenque. El tron mi sont chant esiecle. Em paron fuillat ligiscle. Si son pres elassatz en ioi. Q(ue) ren no(n) uei qem sia croi. |
Car enaisi m’o en verse, que plan mi senblon li tertre e tenc per flor lo conglapi, e.l caut me si.us que.l freig trenque, e.l tron mi sont chant e siecle, e.m paron fuillat li giscle : si son pres e lassatz en ioi que ren non vei que.m sia croi. |
| III | III |
| M as una ien fade uersa. Conseran noiritz entertres. Qem fan trop pietz qe congla- pis. Cus qeos ab sa lenga tre(n)ca. Epar lo(m)- bas et ab siscles. Enoi ual bastons ni giscles. Ni menassas anz lor esiois. Can fan zo p(er) co(m) los clam crois. |
Mas una gen fad’ e versa, con s’eran noiritz en tertres, que.m trop fan trop pietz qe conglapis, c’us qeos ab sa lenga trenca e par l’om bas et ab siscles, e no i val bastons ni giscles ni menassas, anz lor es iois can fan zo per c’om los clam crois. |
| IV | IV |
| C ar en baizan nous en uerse. Nomo tollo(n) ual ni tertre. Domna ni iel ni conglapi. Mas mon poder par quem trenca.Domna per cui chant esiscle. Uostre bel oil mison giscle. Qem chastion sil cor ab ioi. Qe no(n) aus auer talan croi. |
Car en baizan no.us en verse no m’o tollon val ni tertre, domna, ni iel ni conglapi, mas mon poder par que.m trenca : domna per cui chant e siscle, vostre bel oil mi son giscle qe.m chastion si.l cor ab ioi qe non aus aver talan croi. |
| V | V |
| A natai con causen uersa. Lonc temps cer- can uals etertres. Marritz con om qui co(n)- glapis toca. Emasella trenca. Canc non conques chanz ni siscles. Plus que fels clers conquers gisclis. Mas ardieu laum- al b(er)ga iois. Malgrat dels fals lausengiers crois. |
Anat ai con caus’en versa lonc temps cercan vals e tertres, marritz con om qui conglapis toca e masella trenca, c’anc non conques chanz ni siscles plus que fels clers conquers gisclis, mas ar, Dieu lau !, m’alberga iois malgrat dels fals lausengiers crois. |
| VI | VI |
| M on uers an caisi len uersi. Que nol ten- gon uals ni tertres. Lai on hom no(n) sent conglaips. Ni afreig poders qui trenque. Amidons lozant elsiscle. Clar quel cor li in- tron giscles. Si aqui gent lui chant ab iois. Que nos tain acant adors crois. |
Mon vers an, c’aisi l’enversi que no.l tengon vals ni tertres, lai on hom non sent conglaips, ni a freig poders qui trenque. A midons lo zant e.l siscle clar que.l cor li intron giscles si aqui gent lui chant ab iois, que no.s tain a cantadors crois. |