| I | |
| Dame cis uostres fins amis qui tout son cuer a en uos mis. de uos amer est si sorpris. que de ior et de nuit est pris. uos mande que sachiez de uoir. qil uos aime sanz deceuoir. en uos amer na pas mespris. |
Dame, cis vostres fins amis, qui tout son cuer a en vos mis, de vos amer est si sorpris que de jor et de nuit est pris, vos mande que sachiez de voir q’il vos aime sanz decevoir; en vos amer n’a pas mespris. |
| II | |
| Dame quant de uous me souuient. une tel ioie au cuer men uient. quamors me lace qui me tient. uostre douz re gars me soustient. qui soef ma le cuer enble. et souue(n)t me ra il senble que de uos tou te ioie uient. |
Dame, quant de vous me souvient, une tel joie au cuer m’en vient qu’Amors me lace, qui me tient. Vostre douz regars me soustient, qui soëf m’a le cuer enblé; et souvent me ra il senblé que de vos toute joie vient. |
| III | |
| Amours aiez de moi merci. que mon cuer qui nest mie ci. fetes ioia(n)t et priez li. que il li souui engne de mi. mes certes u(o)s nen feroiz rien. car ie uous aim seur toute rien. por ce sel metroiz en oubli. |
Amours, aiez de moi merci, que mon cuer, qui n’est mie ci, fetes joiant, et priez li que il li souviengne de mi. Més certes vos n’en feroiz rien, car je vous aim seur toute rien; por ce sel metroiz en oubli. |
| IV | |
| Onq(ue)s nus ne uous ama tant com ie faz qui touz iorz entent. auos seruir ueraieme(n)t. por ce sont perdu li amant. que trop leur fetes acheter. ce dont il deuroient chanter dex si fetes pechie trop gra(n)t. |
Onques nus ne vous ama tant com je faz, qui touz jorz entent a vos servir veraiement. Por ce sont perdu li amant, que trop leur fetes acheter: ce dont il devroient chanter. Dex si fetes pechie trop grant! |
| V | |
| Dame merci merci ce(n)t foiz. de moi qui sui ensi destroiz. por uos quor sui chauz or sui froiz. or chant or plor et or souspir. ie conmant auos mon espir; ne sai se merci en auroiz. |
Dame, merci, merci cent foiz de moi qui sui ensi destroiz por vos, qu’or sui chauz, or sui froiz, or chant, or plor et or souspir. Je conmant a vos mon espir; ne sai se merci en avroiz. |