| I. Ab lo pascor. mes bel qeu chant en estiu alen\t/ran de mai car par la flors. sobrels uerchant. e son reuerdezit li glai. mout mi ual pauc lo temps cortes. qeu non ai ioi ni non la des ni de sa ]comp(a)gn[ compagnia non lau. |
| Ab lo pascor m'es bel q'eu chant, en estiu, a l'entran de mai, car par la flors sobre·ls verchant, e son reverdezit li glai; mout mi val pauc lo temps cortes, q'eu non ai joi ni non l'ades ni de sa compagnia non lau. |
| II. Per qe damor an atretan. li maluas enoios sauai. con li meillor el plus prezan. iouenz e faig fraing e dechai. e maluestatz a son luec p(re)s en amistatz. camics non es amatz ni damig\u/a nos iau. |
| Per qe d'amor an atretan li malvas enoios, savai, con li meillor e·l plus prezan. Jovenz *e faig* fraing e dechai e Malvestatz a son luec pres en amistatz, c'amics non es amatz ni d'amigua no·s jau. |
| III. Ben sai qe lor es mal estan als molleiratz. car se fan gai dom neiador. ni drude]r[\i/an. el guizardos qe lor neschai ditz el repro cher lo paies. qi glazi fai aglazi es feritz deis lo seu colp mortau. |
| Ben sai qe lor es mal estan als molleiratz, car se fan gai domnejador ni drudejan; e·l guizardos qe lor n'eschai ditz el reprocher lo pajes: "Qi glazi fai, a glazi es feritz d'eis lo seu colp mortau." |
| IV. Fals amador al meu semblan. uostrer lo danz e non pueis mai. de gran folor. es acordan. can lus lautre. galietrai. e pos uos aues enqes drut mo\i/lleirat marit tug tres. sias del pechat comunau. |
| Fals amador, al meu semblan, vostr'er lo danz e no·n pueis mai; de gran folor es acordan can l'us l'autre gali' e trai; e, pos vos aves enqes, drut, *moilleirat* marit, tug tres, sias del pechat comunau. |
| V. El fuec maior seretz arden. al iuzizi del derrer plai. engana dor fel desleiau. en la pena qe no trasuai. on sera totz. lo mals el bes. iuziatz e nom clam merces donna caia drut des leiau. |
| El fuec maior seretz arden al juzizi del derrer plai, enganador, fel, desleiau, en la pena qe no trasvai, on sera totz lo mals e·l bes juziatz; e no·m clam merces donna c'aia drut desleiau. |
| VI. Non a ualor daissi enan. cela cabdos ni ab tres iai. (et) ai \n/enqer lo cor tristan. qe dieus tan falsa non fetz sai. miels li fora ia no(n) nas qes. enanz qe failliment fes. don er parlat tro en peitau. |
| Non a valor d'aissi enan cela, c'ab dos ni ab tres jai; et ai·n enqer lo cor tristan, qe Dieus tan falsa no·n fetz sai; miels li fora ja non nasqes enanz qe failliment fes, don er parlat tro en Peitau. |
| VII. Saint saluaire fai malber gan. lai el regne on mi donz estai. ab la genzer. si qen baizan. si en nostre couen uerai. e qem do zo qe ma promes. pueis al iorn sen ira conq(e)s si be les mal. al gelos brau. |
| Saint Salvaire fai m'albergan lai, el regne on mi donz estai, ab la genzer, si q'en baizan sien nostre coven verai e qe·m do zo qe m'a promes; pueis al jorn s'en ira conqes, si be l'es mal al gelos brau. |
| VIII. Amics dignas lim can laues. si passal terme qauem pres. qieu soi motz p(er) sain nicolau. |
| Amics, dignas li·m, can la ves, si passa·l terme q'avem pres, q'ieu soi motz, per Sain Nicolau! |