I
Pos de chantar m'es pres talenz,
farai un vers don sui dolenz:
non serai mais obedienz
en Peitau ni en Lemozi.
II
Qu'era m'en irai en eisil;
en guerra laissarai mon fil,
en gran paor, en gran peril;
e faran li mal siei vezi.
III
Lo departirs m'es aitan grieus
del seignorage de Peitieus;
en garda lais Folcon d'Angieus
tota la terra e son cozi.
IV
Si Folcos d'Angieus no·l socor
e·l reis de cui ieu tenc m'onor,
guerreiar l'an tut li plusor,
felon Gascon et Angevi.
V
Si ben non es savis ni pros
cant ieu serai partitz de vos,
vias l'auran tornat en jos
car lo veiran jove mesqui.
VI
Merce clam a mon compaignon,
s'anc li fi tort, q'il m'o perdon;
et il prec en Jezu del Tron
en romans et en son lati.
VII
De proeza e de joi fui,
mais ara partem ambedui;
et eu irai m'en a scellui
on tut peccador troban fi.
VIII
Mout ai estat cuendes e gais
mas nostre Seigner no·l vol mais;
ar non puesc plus soffrir lo fais
tant soi aprochatz de la fi.
IX
Tot ai guerpit cant amar sueill:
cavalaria et orgoill;
e pos Dieu platz, tot o acueill,
e prec li que·m reteng'am si.
X
Toz mos amics prec a la mort
que·il vengan tut e m'onren fort,
qu'eu ai avut joi e deport
loing e pres et en mon aizi.
XI
Aissi guerpisc joi e deport
e vair e gris e sembeli.