I
Compaigno, non pus mudar qu'eu no m'effrei
de novellas qu'ai auzidas et que vei,
qu'una domna s'es clamada de sos gardadors a mei.
II
E diz que non volo prendre dreit ni lei
ans la teno esserrada quada trei;
tant l'us no·ill larga l'estaca que l'altre plus no la·ill plei.
III
Et aquill fan entre lor aital agrei:
l'us es compains gens a foc, manduc'arrei,
e meno trop major nauza que la mainada del rei.
IV
Et eu dic vos, gardador, e vos castei
(e sera ben grans folia qui no·m crei):
greu verrez neguna garda que ad oras non sonei.
V
Qu'eu anc non vi nulla domn'ab tan gran fei
qui no vol prendre son plait on sap mercei,
s'om la loigna de proessa, que ab malvastatz non plaidei.
VI
E si·l tenez a cartat lo bon conrei,
adoba·s d'aquel que troba viron sei:
si non pot aver caval, ela compra palafrei.
VII
Non i a negu de vos ja·m desautrei,
s'om li vedava vi fort per melevei,
non begues enanz de l'aiga que·s laisses morir de sei.
VIII
Chascus beuri'ans de l'aiga que·s laises morir de ssei.