Bartsch - Koschwitz

Versione stampabilePDF version

I.
Quan lo rius de la fontana
sesclarzis, si cum far sol,
e par la flors aiglentina,
e·l rossignoletz el ram
volf e refranh et aplana
son doutz chantar et afina,
dreitz es quieu lo mieu refranha.

II.
Amors de terra lonhdana,
per vos totz lo cors mi dol;
e no·n puosc trobar meizina,
si non vau, al sieu reclam,
ab atraich damor doussana
dinz vergier o sotz cortina
ab desirada companha.

III.
Pois del tot men falh aizina,
no·m meravilb sieu naflam;
car anc genser crestiana
no fo, ni Dieus non la vol, 
juzeva ni sarrazina.
Ben es cel pagutz de mana
qui ren de samor gazainha!

IV.
De desir mos cors non fina
vas cella ren quieu plus am,
e sai que volers mengana
si cobezesa la·m tol;
que plus es ponhens quespina
la dolors que ad joi sana,
don ja no vuolh com men planha.

V.
Senes breu de pargamina
tramet lo vers, que chantam
en plana lenga romana,
a n Hugon Brun por Filhol.
Bo·m sap, car gens peitavina
e totz Angeus e Guaian
s’esgau per lui, e Bretanha.