I.
Trop m'es<t> sovant fine Amors anemie,
se me mervoil comant ie puis dureir:
si ait del tout ma volenteit saixie
ke per chalour me fait sovant trambleir.
Lais, en dormant seux en sa compaignie,
et quant m'esveil, semble moy c'om m'ocie:
mar apris a ameir.
II.
D'Amors me fut si belle l'acoentance
a comencier ke je m'outrecuidai.
Or voi je bien k'il me torne a anfance;
folie fix k'en si hault leu pensai.
Lais, c'ai je dit? muels en ain l'esperance
k'estre empareire et coroneis de France:
onkes maix tant n'amai.
III.
On dist sovant c'Amors ne choisist mie;
per teil raixon veul a li demoreir.
Awerous est en cui elle se fie
et plux s'en doit de meffaire gairdeir.
Maix poour ai ke celle ne m'oblie
cui j'ai doneit et cuer et cors et vie
et voloir et penseir.
IV.
Se je peüsse dire ma mesestance,
j'eüsse, espoir, joie plux ke je n'ai,
maix a besoig pert si ma contenance
ke mon penseir descovrir ne li sai,
si fais con cil ki de morir s'avance:
celle m'ocist sens nulle defiance
a cui je me donai.
V.
He, franche riens, se li cors se hontoie
k'il ne vos seit sa parolle conteir,
lou cuer aveis en vo douce baillie.
A mon besoing ne me puis conforteir;
souffreis, dame, per vostre cortoisie,
ke mes cors faice a mon cuer compaignie
tant ke puisse parleir.