| I | |
| PVois de chantar mesp(re)s talenz. Farai un uers do(n) sui dolenz. Mas n(on) serai Obedie(n)z. En pitau ni en limozi. |
Puois de chantar m'es pres talenz farai un vers don sui dolenz; mas non serai obedienz en Pitau ni en Lemozi. |
| II | |
| Quera men irai enei- ssil. En gran paor et en peril. En guerra laissarai mo(n) fill. Efaran mal siei uezi. |
Qu'era m'en irai en eissil en gran paor et en peril, en guerra laissarai mon fill e faran mal siei vezi. |
| III | |
| Lo departirs mes aitan grieus. Del sei(n)gno- rage de peitieus. En garda de fol con dangi- eus. Lais la terra eson cosi. |
Lo departir m'es aitan grieus del seingnorage de Peitieus; en garda de Folcon d'Angieus lais la terra e son cosi. |
| IV | |
| Si fol tos dangieus nol socor. El reis de cui ieu tenc monor. Faran li mal tut li plu- sor. fellon gascon et angeui. |
Si Foltos d'Angieus no·l socor e·l reis de cui ieu tenc m'onor, faran li mal tut li plusor fellon Gascon et Angevi. |
| V | |
| Si ben no(n) es sauis ni pros. Qua(n)t eu serai partitz de uos. Uiatz lauran tornat en ios. Car lo ueiran ioue mesqui. |
Si ben non es savis ni pros quant eu serai partitz de vos, viatz l'auran tornat en ios car lo veiran iove mesqui. |
| VI | |
| Per m(er)ce prec mo(n) (com)pai(n)gnon. Sanc li fi tort quil mo perdo. Et il prec en iezu del tro. En roma(n)s et en son lati. |
Per merce prec mon compaingnon, s'anc li fi tort, qu'il mo perdo, et il prec en Iezu del tro en romans et en son lati. |
| VII | |
| De proessa edeioi fui. Mas ara parte(m) ambe- dui. Et ieu irai men acellui. On tut pecca- dor troban fi. |
De proessa e de ioi fui mas ara partem ambedui et ieu irai m'en a cellui on tut peccador troban fi. |
| VIII | |
| Mout ai estat cuedes egais. Mas nostre se- ingner nol uol mais. Ar no(n) posc pl(us) soffrir lo fais. tant sui aprochatz de lafi. |
Mout ai estat cuedes egais mas Nostre Seingner no·l vol mais; ar non posc plus soffrir lo fais tant sui aprochatz de la fi. |
| IX | |
| Tot ai guerpit qant amar suoil. Caualla- ria et orgoill. Epois dieu platz tot oacuoill. E prec lui q(ue)m retengab si. |
Tot ai guerpit qant amar suoil: cavallaria et orgoill; e pois dieu platz tot o acuoill e prec lui que·m reteng'ab si. |
| X | |
| Totz mos amics p(re)c ala mort. Queil ue(n)ga(n) tuit emo(n) ren fort. Q(ue)u ai auut ioi e deport. Loing epres (et) amo(n) aizi. |
Totz mos amics prec a la mort que il vengan tuit e m'onren fort, qu'eu ai avut ioi e deport loing e pres et a mon aizi. |
| XI | |
| Aissi guerpisc ioi edeport. Euair egris e senbeli. |
Aissi guerpisc ioi e deport e vair e gris e senbeli. |