Tu sei qui

Edizione diplomatico-interpretativa

Schede primarie

OR ne puis ie plus ce ler le mal damors que ie sent si me destroint dure ment que ne puis aillors penser. bien doi oblier toute autre pensee pour fineamor qui sest afermee en moi sanz retor.	I. Or ne puis je plus celer le mal d'amors que je sent, si me destroint durement que ne puis aillors penser. Bien doi oblier toute autre pensee pour fine Amor qui s'est afermee en moi sanz retor.
Cist maux me uint des garder (et) si me prist en pensant. mout me g(ri)eue et mout me plait tant q(ue) nen puis mon cuer oster. ne nos de mander ce que plus magree. mais p(ar) amors miert ioie don- nee se ie lai mil ior.	II. Cist maux me vint d'esgarder et si me prist en pensant: mout me grieve et mout me plait tant que n'en puis mon cuer oster, n'os demander ce que plus m'agree, mais par Amors m'iert joie donee, se je l'ai mil jor.
Riens ne puis tant desirrer nautre ioie ne dema(n)t fors q(ue) ueoir so(n) se(n)bla(n)t. son douz ris so(n) biau p(ar)ler. (et) son douz penser sauoir a celee. q(ue) samors me fust donee sa(n)z au trui am(or).	III. Riens ne puis tant desirrer n'autre joie ne demant fors que veoir son semblant, son douz ris, son biau parler et son douz penser savoir a celee que s'amors me fust donee sanz autrui amor.
Se ta(n)t me uoloit doner fait mauroit lie (et) ioia(n)t mes mieuz vuil tout mon ui- uant por li griez maux endur(er) q(ue) p(ar) son p(ar)ler u(er)s moi fust iree cele ou mamor ai tote ator- nee. sanz faire autre ator.	IV. Se tant me voloit doner, fait m'avroit lié et joiant; més mieuz vuil tout mon vivant por li griez maux endurer que par son parler vers moi fust iree cele ou m'amor ai tote atornee sanz faire autre ator.
Dame cui ie nos no(m)mer a uos me doi(n)g en coma(n)t. (et) ta(n)t laing (et) plus por itant. que ie v(os) ai tant ame (et) si bien cele conq(ue)s a rien nee ne dis mamor. ia miert acusee p(ar) faux iangleour.	V. Dame cui je n'os nommer, a vos me doing en comant et tant l'aing et plus por itant que je vos ai tant amé et si bien celé c'onques a rien nee ne dis m'amor: ja n'iert acusee par faux jangleour.
Gent cors au uis cler soiez ape(n)- see de ceste amour. q(ue)cor soit os- tee p(ar) uos ma dolour.	VI. Gent cors au vis cler, soiez apensee de ceste amour qu'encor soit ostee par vos ma dolour.
Amauri ]de[ desuer doit bie(n) cil qui bee. a tel amour qui li est uehee. sanz auoir doucour.	VII. Amauri, desver doit bien cil qui bee a tel amour qui li est vehee sanz avoir douçour.